De geschiedenis van Zoeë Is Ut Laeve

De kepèl is gebaore op 10 april 2008 tiedes de fusievergadering van Joekskepèl Hoëge Noë(d)t en de Köbes Kepèl.Die fusie waas nuuedig umdet edere kepèl aafzónderlik ein ónderbezetting had waodoor leuk meziek make lastig woort.

Alle muzikante hadde ein veurstel meuge doon veur eine naam van de nieje kepèl en nao stumming bleek det Zoeë Is Ut Laeve beej de meiste in gooj aerd veel. De naam duit rech aan alles waat d’r gebeurd is en alles waat d’r nog geit gebeure.

Tiedes diezelfde vergadering woort ’t besteur gekaoze en inkele kemissies opgerich, want d’r waas nog genóg werk te doon. ’t Rippertwaar meus waere vasgesteld, welke kleier gaon we aan doon, wae regelt de aktiviteite en zoeë had idderein de hendjes vol.

Um de gebaorte in stiel te viere óntstónd ’t idee det d’r dan ouk ein duipfees meus waere gehalde. Det leek idderein waal kwant zoeëdet met die organisasie woort begónne. Op dónderdaag 3 juli 2008 ging ein en ander gebeure. Lokasies woorte geregeld, ein dreijbook gemak, beschute gesmaerd en met sókkerkäörkes bestruijd, blome gehaold en neet te vergaete, ein vaetje beer. Wethalder Peter Freij waas bereid gevónde um de duipplechtigheid te doon op de Mert veur ‘t stadhoes. Det ging gepaard met ’t aanslaon van ein vaetje beer zoeëdet idderein kós prooste op de jóngste kepèl van Groeët Venlo.

Gestart woord met 23 muzikante waodoor ’t neet meugelik waas um in de Gaaspièp te gaon rippetere, dao waas ’t te klein. De keus veur de kelder ónder Zalzershaof loog veur de hand, en det is wies noow ’t geval. De gasvreejheid van de dames die ós van ein drenkske veurzeen, zörgde d’r veur det idderein zich flot thoes veulde.

Me mót altied maar aafwachte of ein samesmölting van ‘ne gas luuj positief oetwerk. In dit geval kin gezag waere det ’t geweldig klik tösse de muzikante en, ouk hiel belangriek, tösse de partners. Gezelligheid en leuk meziek make geit weer hand in hand en det guf euveral blieje gezichte. Dao is ’t um begós, want einen daag neet gelache is einen daag neet gelaef. Plök d’n daag en bedink beej al wat d’r gebeurt: Zoeë is ’t Laeve.